СТИХИ О ТОМ, "КАКО ГОСПОДЬ НЕМОЩНЫХ УКРЕПИ ПРОТИВО СОПОСТАТ"
ИЗ СКАЗАНИЯ ОБ ОСАДЕ ТРОИЦКОГО МОНАСТЫРЯ
И разумешя вси чюдотворца молитвы и поспех,
И уже нази не боятся блещащихся доспех.
И хотящеи дом пресвятыя Троица гордостно низложити осадою,
Всегда обагряеми кровьми бегают от немощных низлагаеми подсадою.
И ждущеи приати различныя муки
В руки своя прияша крепкия луки.
И лениви бышя к жерновом востающеи мельцы,
Внезапу бышя на сопротивных удалые стрельцы.
Не часто уже ударяются к стенам носящеи на главах шлемы.
Смерти бо ищущеи во очеса тем верзающеся яко пчелы;
К язвам же сынове беззаконнии всегда суть терпки,
Но зверски низлагаются кормящимися серпы.
СТИХИ О "ПОБИВАЕМЫХ У ДРОВ"
ИЗ СКАЗАНИЯ ОБ ОСАДЕ ТРОИЦКОГО МОНАСТЫРЯ
И мнозем руце от брани престаху;
всегда о дровех бои злы бываху.
Исходяще бо за обитель дров ради добытиа,
во град возвращахуся не бес кровопролитиа.
И купивше кровию сметие и хврастие,
и тем строяще повседневное ястие;
к мученическим подвигом зелне себе возбуждающе,
и друг друга сим спосуждающе.
Иде же сечен бысть младый хвраст,
ту разсечен лежаше храбрый возраст;
и идеже режем бываше младый прут,
ту растерзаем бываше птицами человеческий труп.
И неблагодарен бываше о сем торг:
сопротивных бо полк со оружием прискакаше горд.
Исходяще же нужницы, да обрящут си веницы,
за них же и не хотяще отдааху своя зеницы.
Текущим же на лютый сей добыток дров,
тогда готовляшеся им вечный гроб...
Их же Господь еще закры, тии благодарствоваху,
а их же суд постиже, тии злые рыкаху.
Отец бо исхождаше, да препитает си жену и чяда,
и брат брата и сестры, тако же и чяда родителей своих;
и вкупе вношаеми бываху дрова
и человеческаа глава.
